ఇంట్లో సినిమా చూడాలంటే కార్పొరేట్‌కు కప్పం?

 - ఓటీటీలు, ఇంటర్నెట్ ప్యాకేజీలు... వినోదమా? లేక వినియోగదారుడిపై భారమా?

ఒకప్పుడు ఇంట్లో సినిమా చూడటం అంటే దూరదర్శన్, తర్వాత కేబుల్ టీవీ. నెలకు వంద రూపాయల లోపే కుటుంబమంతా వినోదాన్ని ఆస్వాదించేది. ఇప్పుడు పరిస్థితి పూర్తిగా మారిపోయింది. ఇంటర్నెట్ లేకుండా ఏ పని జరగని పరిస్థితిని సృష్టించిన కార్పొరేట్ వ్యవస్థ, అదే అవకాశాన్ని వ్యాపారంగా మలుచుకుని సాధారణ ప్రజల జేబుపై భారీ భారం మోపుతోంది.

నేడు సినిమా, వెబ్ సిరీస్ లేదా క్రీడా ప్రసారాలు చూడాలంటే ఒక్క ఓటీటీ చందాతో సరిపోవడం లేదు. ఒకటి సినిమా కోసం, మరొకటి క్రికెట్ కోసం, ఇంకొకటి వెబ్ సిరీస్ కోసం, మరోటి ప్రాంతీయ కంటెంట్ కోసం... ఇలా ఒక్కో ప్లాట్‌ఫామ్‌కు ఒక్కో చందా. వీటికి తోడు ఇంటర్నెట్ ఖర్చు తప్పనిసరి. కొన్ని టెలికాం సంస్థలు తమ బ్రాడ్‌బ్యాండ్ లేదా మొబైల్ ప్యాకేజీలతో ఓటీటీలను కలిపి "ఫ్రీ" అని ప్రచారం చేస్తున్నా, వాస్తవానికి ఆ ఖర్చు వినియోగదారుడే భరిస్తున్నాడు.

మధ్యతరగతి కుటుంబానికి నెలకు వెయ్యి రూపాయలకు పైగా వినోదం కోసం ఖర్చు చేయాల్సిన పరిస్థితి ఏర్పడుతోంది. ఇది వినోదం కంటే ఆర్థిక భారం అనే చెప్పాలి.

ఇక్కడితో సమస్య ఆగడం లేదు. డబ్బు చెల్లించి సభ్యత్వం తీసుకున్న తర్వాత కూడా ఓటీటీల్లో వరుసగా ప్రకటనలు వస్తున్నాయి. రెండు నిమిషాల చొప్పున ప్రకటనలు ప్రసారం చేయడం వల్ల ప్రేక్షకుడి అనుభవం దెబ్బతింటోంది. ఒకప్పుడు ఉచిత ప్రసారాల్లో ప్రకటనలు రావడం సహజం. కానీ డబ్బు చెల్లించిన తర్వాత కూడా అదే పరిస్థితి కొనసాగితే వినియోగదారుడు ప్రశ్నించాల్సిందే.

విచిత్రమేమిటంటే, థియేటర్‌లో సినిమా చూస్తే సినిమా ప్రారంభమైన తర్వాత ప్రకటనలతో అంతరాయం ఉండదు. ఇంటర్వెల్ సమయంలో ప్రకటనలు వచ్చినా ప్రేక్షకుడికి ఇబ్బంది ఉండదు. కానీ ఇంట్లో డబ్బు చెల్లించి చూస్తున్నప్పుడు మాత్రం మధ్యలో వచ్చే ప్రకటనలు ప్రేక్షకుడిని విసిగిస్తున్నాయి.

ఇది కేవలం వినోద రంగానికి సంబంధించిన అంశం మాత్రమే కాదు. కార్పొరేట్ సంస్థలు ముందుగా వినియోగదారుడిని తమ సేవలకు అలవాటు చేసి, తర్వాత నెమ్మదిగా ధరలు పెంచడం, అదనపు నిబంధనలు తీసుకురావడం, ప్రకటనలను పెంచడం వంటి వ్యూహాలను అనుసరిస్తున్నాయనే విమర్శలు పెరుగుతున్నాయి. వినియోగదారుడికి ప్రత్యామ్నాయం లేకుండా చేయడం ఆరోగ్యకరమైన మార్కెట్ వ్యవస్థ కాదు.

వినోదం అనేది విలాసం కాదు. కుటుంబం అంతా కలిసి కొంత సమయం ప్రశాంతంగా గడిపే సాధనం. దానిని కూడా కార్పొరేట్ లాభాల కోసం భారంగా మార్చడం ఆందోళనకర పరిణామం. ఈ నేపథ్యంలో ప్రభుత్వం, నియంత్రణ సంస్థలు ఓటీటీ ధరల విధానం, చెల్లింపు సభ్యత్వాల్లో ప్రకటనల పరిమితి, వినియోగదారుల హక్కులపై స్పష్టమైన మార్గదర్శకాలు రూపొందించాల్సిన అవసరం ఉంది.

అలాగే వినియోగదారులు కూడా ప్రతి కొత్త ప్లాట్‌ఫామ్‌కు సభ్యత్వం తీసుకోవడం, అవసరం లేని ప్యాకేజీలకు డబ్బు చెల్లించడం వంటి అలవాట్లను పునఃపరిశీలించాలి. సాంకేతికత మన జీవితాన్ని సులభతరం చేయాలి గానీ, వ్యసనంగా మార్చి ఆర్థికంగా బలహీనపరచకూడదు.

వినోదం ప్రజల హక్కు. దానిని కార్పొరేట్ కప్పంగా మార్చే ధోరణిని సమాజం ప్రశ్నించాల్సిన సమయం ఆసన్నమైంది.

- ఉమారావు

ఎడిటర్, వైకుంఠపాళి